米線樂•麻辣豬骨濃湯 (已結業)

今日去開長沙灣果邊有啲野處理，處理完之後行行下就見到呢間主打米線同涼皮嘅餐廳，都有唔少人等外賣，就一於去試下啦。量完體溫之後就好快安排我哋入座。見到啲裝修都好有心機，坐落都好舒服。睇左下個餐牌，主打就有米線同涼皮，另外仲有唔少小食同飲品嘅選擇架。我哋就要左一個微辣嘅酸辣豬骨濃湯米線配肥牛同魚片頭，另外一個要左微辣嘅招牌涼拌涼皮配魚腐同黃金花枝丸。小食我哋叫左孜然脆炸雞翼同泡椒鳳爪，飲品我哋要左熱嘅玫瑰洛神花茶同凍嘅蜜桃烏龍茶。飲品就首先上枱，熱嘅呢就用茶壺上，好靚，侍應都提醒我哋要等5分鐘個茶包出味先飲，個味道好香，亦都唔會太濃，飲完好舒暢。而凍味個就支裝嘅，入面真才實料見到有兩個茶包，蜜桃都唔會太甜。小食之後都上枱，個雞翼都唔少，食落炸得啱啱好，唔會過火。而個鳳瓜辣得嚟又好有肉好有咬口，下面仲有啲青瓜做配菜，辣得滯可以解辣。最後就係米線同涼皮上枱，微辣都好香口，兩碗都係大大碗，絕對對得住個價錢。米線個湯底好濃味，而涼皮啲花生就好脆卜卜，個涼拌嘅醬汁好開胃，配埋大大塊涼皮就好好食。另外加錢叫果啲配料都好高質素，食得出唔係啲平貨，大大粒/份，一啲都唔孤寒。如果大家嚟開長沙灣可以嚟試下！