來多碗車仔麵 (民裕街)

营业中

休息中

早上無食到早餐所以諗住下午食得飽D，就簡左食呢間車仔麵。呢間舖嘅店面好整齊，牆上嘅畫亦都好有香港地道色彩。我叫左五餸車仔麵配凍奶茶，選左公仔麵底，五個餸就簡左呢度嘅辣魷魚、魚蛋、貢丸、魚餅同滷水豆卜。收錢檯就係廚房隔離，所以落單比錢後，即刻好快就出到食物。佢會問埋你要唔要佢嘅秘制辣醬，我就簡左小辣。湯底味道唔算太濃，所以食完唔會覺得好口渴，加埋個秘制辣醬，令到個湯有微微辣味，更加惹味。公仔麵個質感都唔錯，浸左係個湯好耐都仍然保持到個韌度，唔會完全淋曬。五個餸之中比較鐘意係滷水豆卜同魚餅。滷水豆卜好入味，一咬啲滷水汁流曬出來，而且個滷水汁又唔太鹹。魚餅個味道甜甜地，幾好食。至於辣魷魚就好彈牙，味道無想像中咁辣，但都唔錯。