佢地集團主要戰線都都係集中係尖沙咀同埋銅鑼灣依兩個地方
不過依間平民版嘅食物種類都唔算少
一般放題店可以食到嘅野，依度都會有
餐單字母由S到J，總共有11項款式可以揀
都算係咁啦
1
刺身拼盤
食放題點可以唔食刺身呢？
唔少放題只會提供赤蝦一款選擇，但依度就有三款蝦比大家揀
分別係赤海蝦、甜蝦、同埋泰式生蝦，鐘意食蝦嘅朋友一定唔可以錯過
加上依度嘅刺身好新鮮，特別推薦三文魚同劍魚腩
蒲燒鰻魚
細細粒，又有好香鰻魚味
結果好快就比我朋友清晒
法式忌廉焗青口&蜜糖醬燒雞中翼
由於兩樣野黎嘅時間差唔多，所以就放埋一齊影
法式忌廉焗青口嘅汁好香，有好濃郁嘅忌廉味。加上青口細細舊，食多幾舊都唔會有飽肚感
但蜜糖醬燒雞中翼嘅味道同自家制嘅冇咩分別，唔係雞翼控嘅朋友可以直接跳過
黃金炸生蠔＆芝麻雞翼＆流心一口芝士＆辣酒煮花螺
1
黃金炸生蠔一流
記得要點堆沙律醬黎食
芝麻雞翼比起其他放題店唔算特別出色，味道中規中矩
流心一口芝士嘅芝士味唔算太濃，令我依個芝士控有少少失望
不過佢嘅芝士真係會流心嫁，唔會好似只係食左炸粉咁
辣酒煮花螺，食唔出酒味同螺味。只係食到微微嘅辣味
鹽燒牛舌
好食嘅牛舌絕對唔洗落太多調味料，依度嘅牛舌絕對係靚嘅牛舌
肉質唔會韌，加上落左少少粗鹽同埋黑胡椒就帶返出牛肉嘅鮮味出黎
值得一試
香草燒紐西蘭羊鞍
全晚最令我有驚喜絕對係依個香草燒紐西蘭羊鞍
味道可以拍得上高級西餐廳，羊肉唔會只係得膻味
同埋羊鞍肉質都柔軟鮮甜，唔會乾到冇晒水分
甜品
除左法式焦糖燉蛋之外，其餘甜品我都覺得麻麻地
冇計啦，依間又唔係甜品店，點會有真.甜品師整比你食丫
Häagen-Dazs雪糕
友人生日附送的優惠，士多啤梨味同埋曲奇味嘅Häagen-Dazs雪糕
自助雪糕
自助任品
1
有Somersby飲呀，飲返十罐八罐都已經回左本
總括黎講，依間放題店嘅味道係唔錯，已經贏過坊間唔少放題店
至少食左成晚(其實唔只食左上面咁小野，不過好多都唔記得影)冇一樣野係大伏黎
不過自助任品同雪糕嘅選擇唔算特別多，同埋都係大路飲品
質素唔算太高
不過依度服務態度好好，店員做野好快手
同埋冇試過甩單，值得一讚
