雲南小鍋米線 (已結業)

本身唔係特別"好"米線，不過唔知點解就呢到。未夠12:30，未到午飯高峰時段(學生哥未到)，仲有少量吉位。叫個腩肉雲吞麻辣米線小辣，加熱奶茶。奶茶先到，味道麻麻地，冇咩茶味，始終做唔到茶餐廳水準。不過都可接受啦。等10分鐘，主角先出場。雖則叫小辣，但都好勁，不過冇咩麻香喎？！除非麻=芝麻...米線幾彈牙幾爽口，有水準。腩仔唔肥同好入味，份量亦都唔少。雲吞出色，皮滑餡料足，可惜只得兩隻唔夠喉。而配菜有四種，酸菜、芽菜、肉碎同韭菜。食之前攪攪好，因為肉碎沉晒底。尋日眼見三位阿姐，其中一個仲應該做外賣，都幾踼腳。廚房又好似得一個師傅咁大把，所以上菜都幾慢。繁忙時間唔知點算？！$20 包兩，加$3 凍熱飲品。價錢掂！