極品靚鍋 (已結業)

天氣凍最適合打邊爐，星期日決定買外賣返屋企打邊爐慢慢嘆。呢間舖頭外賣自取仲有8折添，滿$600仲有75折。我選了二人餐C（$468）。湯底選了豆乳骨膠原靚雞美顏鍋，一滾起湯頭好有豆香，奶白色好美顏嘅感覺，湯料主要有雞件、黃豆、本菇同埋紅蘿蔔，幾清甜。澳洲短角牛牛柳：牛味濃郁，雖然沒有油花，但肉質瘦得來不會硬。日本黑豚肉片：肉質鬆軟，配少少肥肉，有油香。鮮蝦雲吞：皮薄餡靚，鮮蝦爽。黑松露手打蝦滑：手打蝦滑，爽口彈牙，配黑松露的獨特幽香，好好味。花雕醉雞件：花雕酒香配滑雞件幾正。其他火鍋配料都好有驚喜，例如有八吋長嘅蟹柳，我第一次食，好巨型，而且味道是質素好的那一種蟹柳呢！海鮮方面有蝦，好新鮮，味道鮮甜，肉質爽滑。仲有陳皮魚蛋，咬開啟到真的有粒粒陳皮，陳皮幽香配煙銀口感的魚蛋，好好味。蔬菜方面有蘿蔔、萵筍、冰菜。其中，我最鍾意冰菜，火鍋比較少食，好爽脆，分量再多啲我都會食清光。飲品方面，配有一支自家製夏枯草，打完邊爐可以清熱。仲有一樽冷泡茉莉花茶，都係比較健康嘅飲品。