隨心 (已搬遷) 新店位置

夏日熱辣辣，除咗想食壽司，涼麵，就係食海南雞啦！海南雞就好多地方都有得食，連快餐店都有。但我就唔會求其搵一間食嘅，我對食都有啲要求下。揀咗呢間主打新加坡和馬來西亞菜嘅餐廳，我就點咗隨心海南雞飯（無骨），雞肉食落都幾滑，雞皮爽彈，飯有啲椰香味。朋友就揀咗馬來炒麵（酸辣味），我都試咗啲，炒得有鑊氣，酸辣味又唔會太濃。我地覺得啲嘢食都幾唔錯。餐有跟飲品，價格都相宜。環境無別特別之處，細細間，但都幾多人流。