一風堂 (新港中心) (已結業)

疫情關係，依家尖沙咀區嘅食市都有招出招，經過見到堂食第二碗半價，又咁啱肚餓就走去食。見到佢做緊一款增量版嘅推廣，就直接揀咗佢黎試。叫咗個白丸，入面有3塊慢煮豬柳叉燒同3塊卷腩叉燒，卷腩叉燒仲可以免費轉做火灸，強烈建議轉火灸！燒過嘅卷腩肉，食落陣香油係個口到遊走，再加啖湯麵，正呀另外我覺得佢個豬骨湯底都唔錯，唔係好鹹，不過就有小小油啦，但個人覺得還可以接受。以上一碗只係要$88，平時食開一碗拉麵都要百幾蚊，雖然湯底都係有啲特式，但普遍都偏鹹，食到一半都真係頂唔順要加水中和一下，唔係就係咁灌水。對食得清淡嘅朋友仔而言，再好味再特別嘅湯底都係只有一個字：鹹！另外仲追加咗粒溫泉蛋，粒蛋就唔係太流心啦，蛋黃外圍都已經見到熟咗少少啦。整體係講，好味又平又抵食，最後埋單加埋加一都係人均$82。