HIKARI

去開荃灣行街，行到累周圍搵野食，就比佢門面果塊極大落地玻璃吸引左。店內好簡潔，坐落好舒適，簡單的配置同柔和的光線，行到累入去抖抖真係一流！餐廳有唔少種類嘅選擇，小食、意粉、飯類、甜品都各有特色，行到好餓，決定大吃大喝！首先嚟到嘅係慢煮安格斯牛肩肉蝴蝶粉，牛肩肉慢煮完夠晒淋，仲有牛味，好食！加上份量都算ok，好滿足。意粉就配以番茄醬，食落都清新消膩。另外一個主菜係比目魚蝴蝶粉，比目魚燒得好香，魚油油脂夠，好香好好食。蝴蝶粉就以奶油白汁調味，好滿足，正！小食方面，原來2個主菜都差唔多，所以就叫個蟹餅小小意思咁啦。蟹餅配蒜蓉蛋黃醬真係好夾，啖啖蟹肉絲煎成十份香口既蟹餅，食之前再點蒜香蛋黃醬，平衡返油膩感同熱氣程度又可以為食材帶來不同層次，好味，呢個必叫！飲品方面就叫左熱既焙茶鮮奶，焙茶茶味香濃，飲落好順口舒適，最重要係個拉花好有心機，係一隻飛馬黎嫁😍。叫多個凍飲試試，呢杯係黑芝麻鮮奶，芝麻味極香，亦有好多芝麻碎係杯底，有香味有口感，加上鮮奶順滑，飲落又清新又舒服😌。最後，見到每台都會叫既髒髒Tiramisu，酒味香，咖啡味濃，佢地既手指餅有小小脆口，為呢餐劃上一個完美既句號。