廟街玉子燒 (已搬遷) 新店位置

呢間嘅玉子燒之前喺美食展試過經已好鍾意，今次喺廟街竟然可以搵到，咁就梗係去試試啦～～因為喺街邊，老闆就席地開啲枱比大家坐低食 好鬼正講返玉子燒先，佢哋呢度用料上乘，佢哋用上日本蛋，即叫即整，所以係需要啲時間等待，不過美食嘛！值得等！佢哋嘅玉子燒嫩滑，切開內裡充斥住濃郁蟹醬，仲有流心可以拉絲嘅芝士～～芝士咸香同蟹醬嘅鮮味混合埋一齊，而玉子燒表面除左沙律醬外，仲有木魚絲，紫菜絲，仲有蟹子，令到口感味道更為豐富。除左玉子燒外，佢哋另一邊仲有鐵板魷魚鬚，雞軟骨，牛柳粒。鐵板香味四溢，而今次叫左魷魚鬚同雞軟骨雙拼，佢哋啲雞軟骨較出面其他嘅大，魷魚鬚聽聞係由澳洲入口，所以亦非常粗身，口感彈牙，而佢哋淋上自家嘅醬汁，味道方面係有點燒汁嘅甜蜜，亦帶有黑椒嘅惹味，令人一食難忘。