十一冰室 (已結業)

今日出灣仔探朋友，朋友仔話有間隱世冰室新開冇耐，唔係好多人知，可以静静地傾下計。雖然地址近地鐵站，但唔係地膽都真係唔會識嚟，我依朋友指示，從地鐵站行去太源街，行到太源街近尾，右邊有個路口再行前少少，就見到呢間門面以藍、白為主調嘅冰室。我地下午茶時間去到，餐牌上嘅茶餐都係23-40蚊，平! 於是我地就放肆咁叫2個餐仲要加小食。邪惡炸雞髀薯角 - 唔只雞髀邪惡，薯角都好邪惡，大件又大份。雞髀脆皮，但都保持到滑滑肉質。迷你糖心蛋肉燥飯 - 糖心蛋賣相同口感都及格﹐肉燥唔多肥膏，所以冇台式肉燥咁肥膩，正合我心意。香酥雞翼 - 即炸，夠晒酥。魚肉腐皮卷 - 配甜辣醬，都幾惹味。至於飲品方便，我點嘅凍紅豆奶茶，紅豆大粒，份量足。朋友話佢杯熱奶茶都唔錯呀。呢個下午價錢係抵食嘅。