Cafe Hillywood (已結業)

佐敦站D出口步行約7分鐘就到呢家地窖西餐廳，一路沿住柯士甸道嘅外圍走走走，就會搵到。推開門走落地窖，會首先見到佢地幅招牌畫，一群白鶴悠然自得咁企喺湖上，睇見心情都舒暢咗一半。呢家餐廳都幾大，夠闊落，坐得舒服。我同我好姐妹太肚餓嘞，叫咗碟fish & chips做前菜姐。好大碟，啱晒我地兩個為食肥妹。上台時夠熱辣辣，所以食落塊魚嘅脆漿夠脆，都薄嘅。魚肉好嫩，食前指定動作搾檸檬汁落去，酸酸地會中和返肥膩感。唔想太單調嘅話，可以連埋他他醬一齊食，好多人食呢味菜都鍾意配他他醬。而薯條呢，比較粗身，夠薯味起沙嘅，可以點啲茄汁食都得！再叫咗個安格斯牛肉眼扒，塊扒都好大塊，最喜歡佢加火箭菜同蕃茄，夠大膽。有啲人可能會覺得火箭菜好苦唔鍾意食，呢次可以試試火箭菜加牛扒一齊食，苦甘之間帶點牛味同油香，會有好juicy 嘅感覺(神奇)。最後總係要食啲粉麵先夠飽。叫咗碟蒜辣大蝦意粉。啲意粉係自家制架！意粉徧硬但炒得夠乾身，而且好有辣勁。蝦夠大，仲有兩隻咁多，仲要開埋邊，易切開嚟嘆。