長發麵家 (已搬遷) 新店位置

中學年代,除左長沙灣外,石硤尾的耀東街,亦係我的熱點之一,除左蘇記烘發強記外,長發麵檔.都係昔日之"舊朋友".超過十年無來,來到即叫最拿手的牛腩河,柱侯系黎講,係佢同陳南記做得最好,牛腩稔熟,柱侯入晒味.係個湯淡左少少.另一味豉油王撈麵,呢度隻豉油王已經調得咸甜適中,最感動係最後加埋豬油先上桌.就算麵本身缺點多多,但當搭上豬油,即刻點石成金.而且長發本身用的幼麵,爽口彈牙無甚鹼水味,加埋豬油直頭完美勝利.當全世界都話要吃得健康之大氣候下,我就一於話之你.學長發老細話齋,撈麵唔落豬油,點會好食呀?!PS:今個係小弟之第400個食評.復出寫食評半年,已經寫左差不多170個食評,連我都覺得有點不可思議.丟空左四年幾,回看當年自己寫果批食評,由第一個Stonegrill到最後的黃色門,睇番都有點面紅.幸好,當年比OR專訪果篇稿,一早消失,否則真係要改名再戰江湖.不過,而家都幾好,眾食友叫我Pumkins或南瓜兄,聽落又幾順耳.黃色門之後,仲諗住封筆,結果重寫半年,竟收鑊甚豐,多謝各位!