辣吧 (已結業)

因為冇時間，所以好耐冇北上食野。咁岩有朋友介紹呢間食辣野，所以就同男朋友黎試下。餐廳外面好有特色，擺設好有趣，有2個大酒缸。入座之後見到呢包紅色野，真係幾搞笑，原來係濕紙巾，餐廳真係搞鬼。我地食吾到太多海鮮，所以冇叫海鮮咖，叫左一個小既四川香鍋。有好多配料揀，睇到我同男朋友眼花繚亂，好似揀打邊爐野食咁，樣樣都想食。揀好既配料會變成一鍋上枱，睇到都嚇親，好大盆，我地2個人實食得好滿足。我地叫左紅薯幼粉，侍應幫我地撈埋落個香鍋度，好好服務。薯粉份量吾少，又彈牙，好有口感。加上我地揀左蒜蓉醬香味，本身辣辣地又香口，同d麵撈埋好惹味。海鮮方面，我地揀左鮮蝦同元貝。鮮蝦有好多隻，已經除殻，食得好方便，新鮮又彈牙，吾錯吾錯。而元貝有2隻，幾肥美，又鮮甜。肉類方面，叫左肥牛、黑豚肉、五花肉，吾會太肥，幾嫩滑，份量都幾多下，變左食肉獸添。好彩重有蔬菜食，叫左金菇、蘿蔔、娃娃菜同秋葵，爽口又健康，秋葵可以降血壓添。最後重叫左豆奶同酸梅湯，解辣同油膩一流。