魷味 (已結業)

呢間車輪餅書籤左一段時間，但未至於有好強烈慾望，畢竟我唔係車輪餅控。是日買完蕎麥麵，又驚唔夠飽，啊，就買兩個試試啦。小店位於1樓嘅一個死角位，主打玉子燒、車輪餅，仲有其他例如西多士、大阪燒等供應車輪餅有四款：紫薯、甜薯、麥香+流心、四味 (麻糬、紅豆、肉鬆、鹹蛋黃)，定價$10/12，確實唔貴。假日關係有不少客人等緊玉子燒，我地嘅車輪餅係即時製作，啊姐話等8分鐘，感覺上等左超過十分鐘。紫薯、四味車輪餅 $10/個車輪餅接過手熱辣辣，揀左兩款口味，10蚊雞，好食嘅話就抵食。車輪餅造型幾可愛，餅皮有動物圖案。可惜不論餅抑或餡都唔係我杯茶。餅皮同餡料半半，老實講我就唔覺得特別爆餡。另外一定要吐糟：明明係四味車輪餅，由餅頭食到餅尾肉鬆、蛋黃都不知所蹤餅皮冇蛋香，濕濕轆轆，就好似食緊一舊濕嘅麵包。慶幸紅豆並非死甜；麻糬唔係話好大舊，亦冇煙韌感。紫薯蓉比較raw，味道偏淡，冇乜添加。戴個頭盔，唔敢話啱唔啱你，純粹唔啱我，哈哈。