花木日本料理 (已結業)

今年嘅花紅比預期多，咁大件事一於買部遊戲機獎勵自己，可惜買咗半日就俾A姐驚喜大發現，即刻捉我去陪佢shopping，用意都係叫我俾錢埋單。買咗半日以為可以返屋企打機啦，佢話仲嬲緊我靜雞雞同靜靜雞買遊戲機，唔話佢知，要食埋大餐，先肯原諒我！嚟到位於尖沙咀嘅花木日本料理，環境以日本木系風格，好有格調。A姐仲話呢到食材高質，想嚟好耐㗎喇。前菜職員首先送上整到好似盤景嘅前菜，夠晒特色！花木仲買人特選壽司十本十款唔同嘅壽司，講真都唔係記得好清楚，有左口魚、池魚、三文魚、拖羅、赤貝、牡丹蝦、海膽等。當中最正係海膽，海膽份量勁多，鋪滿壽司飯面，入口感覺好滿足；牡丹蝦係蝦肉超鮮甜，仲非常膠口；拖羅魚味濃，油脂重，接近入口即溶；油甘魚油脂豐富唔油膩，好滿足。左口魚邊壽司因為我唔小心食咗A姐最愛嘅左口魚邊，所以要另外散叫一份俾佢。左口魚邊口感細滑，好柔軟，魚油爆多，好正。黑松露鰻魚卷鰻魚超長超肥美咁鋪喺卷物上面，上而仲有黑松露，令味蕾更幸福，而卷物內有牛油果同青瓜，令成個卷物更有口感。鹽燒鱈場蟹腳大廚將蟹腳切開，方便食用。而肉質豐富，配上鹽燒，令味道大大提升。