呢間火鍋店朋友之前食過話唔錯，今日就到我黎試下。
由於太肚餓啦，一坐低已急不及待落單～湯底首選朋友推介既招牌花膠鯊魚骨湯湯鍋（佢重配埋泡飯架 ）同埋幾樣火鍋料。
係等火鍋送上前，忍唔住叫咗個小食頂住肚餓先，個小食叫“蟹籽墨魚油炸鬼”，睇佢張相都幾得意，所以叫黎試下。佢係將啲墨魚滑釀係油炸鬼入面然後一齊炸，然後再放蟹籽係面。食落去，熱辣辣，油炸鬼好鬼脆，入面啲墨魚滑彈牙，好味！
之後到主菜啦～花膠鯊魚骨湯濃郁清甜，將啲材料既味煲晒出黎，淨湯我地都飲咗幾碗 ，然後再用湯泡飯，啲泡飯浸到半軟半脆，口感唔錯！
火鍋料肉類我地只揀咗安格斯牛頸脊，其他有水餃、蘿蔔、金茹同響鈴。
雖然牛頸脊唔係最貴嗰隻，但已經覺得肉質唔錯，輕輕滾到剛熟已可入口，好味！
水餃係韭菜餃，啲皮幾滑，都好味！
響鈴唔知係咪即炸既呢，望落好脆咁，浸湯2秒夾返上黎，少少軟身，咁食法我最鍾意 ！
至於店內環境，呢間火鍋店分兩層，雖然枱唔算多，但坐位唔迫，坐得挺舒服！店員服務幾好，菜都上得幾快，整體感覺唔錯！
食完喜歡你火鍋海鮮系列：喜鍋
