K House (已結業)

過到黎呢邊做野諗起芝士炒飯，但原來已經轉左新餐廳，見餐牌唔差又懶得再搵就入黎食。餐廳新開嘅關係人客唔算特別多，環境較靜，但反而咁樣更加感受到小店嘅真摯服務，食物由頭到尾一個比一個更驚喜，令你成餐飯都食得好滿足。今次叫左兩set 晚餐，每人平均$170，性價比好高。粟米忌廉湯粟米味道香甜，口感滑口，仲會有粒粒粟米食到。沙律麵包粒好脆好鬆化，唔係平時食既硬身脆口。生菜爽口，醬汁分佈得好平均，菜既兩面都會有汁，而且唔會太酸。保雲蘇烤澳洲羊扒配薯菜 $168 一碟有3舊羊架，面頭滿佈脆脆地麵包糠，味道好香同好惹味，再配搭埋芥末醬食一流。肉質3舊都整得好好，無過熟變鞋，又無見到紅色未熟位置，好易甩骨，肉質鬆軟仲要好多汁。西班牙乳豬配提子黃薑飯 $158有6舊乳豬，皮又脆又簿，脂肪唔多，肉都係好多汁又嫩滑，配蜜糖芥末醬好好味。黃薑飯味道岩岩好，愈食愈出黃薑既味道，但又唔會太濃烈。甜品上面朱古力布朗尼，朱古力味好濃好濃，濕度剛好唔乾，仲食到一粒粒軟身朱古力。下面綿花糖滿佈椰絲，入口即溶，唔會太甜，兩者配合得好好。甜品份量岩岩好，細細件過下口癮，令成餐飯好完滿。