三和茶餐廳 (已結業)

好耐冇返屋企人食晚飯，點知老媽子唔舒服唔煮飯，要落街食。一家四口就去咗附近以70年代樂富橫頭磡為主題的茶記 - 三和茶餐廳。既然以共同回憶為主題，裝修環境置上懷舊相片，相當有心思。喺另一面牆上置咗六七部直倒式電視機，宣傳每晚主菜，電子化環保得嚟又幾硬銷！四個人叫咗三樣餸《北蒽羊腩煲》、《海味雜菜煲》同《豆腐炆火腩》。一坐低就上四碗例湯。肯定嘅喺冇落味精，但真喺好啖，零火喉。《北蒽羊腩煲》就幾有心思，每人一碟細細哋腐乳辣椒。又有例排生菜，賣相唔錯。一打開煲，我就唊咗一舊羊腩，可能啱啱煲起，第一舊都幾實吓，第二舊就可以淋淋哋，幾好味。成煲腩煲都好入，值得推介。《海味雜菜煲》一冠茶記大排檔風味，味道適中。《豆腐炆火腩》就真喺唔錯，豆腐火腩都好入味，又夠火喉，送飯一流。價錢尚可接受， 《海味雜菜煲》57蚊，《豆腐炆火腩》57蚊， 但 《北蒽羊腩煲》128蚊就貴咗啲。