滿江紅 (已結業)

先旨聲明，我或者就係果D唔醒的香港人，食川菜我識得分麻與辣，又或者有幾辣，係咁多。唯獨是不怕辣，朋友又說呢度D野幾辣，所以就來試試。同兩個朋友來幫襯，京滬菜吃得不少，但川菜是不多吃。平日晚上呢度都唔少人，訂左位都要等一陣至坐得低。呢度裝修佈置都唔錯，以木為主，幾有格調。叫了擔擔麵、麻辣鴨舌併牛腱、夫婦肺片、水煮魚云同辣子雞。擔擔麵唔夠辣，反而覺得有D甜甜地。早知叫?地加辣，個人覺得份量足夠。其實擔擔麵同雲吞麵一樣，係味道行先，份量都是細細碗的，可能香港人食慣權記及沾仔記會覺得呢度唔抵食都唔定；夫婦肺片幾入味，唔算太辣，肺片煮得軟熟，幾好；水煮魚云麻辣味足，魚云明顯給麻辣料撈過，夠味同幾辣，舖面的魚云較辣，沉底果D反而無咁辣，好味；辣子雞舖滿辣椒乾，賣相壯觀且嚇人，係咁多味菜最辣的一味，炸過的雞塊亦幾辣，唔食得辣唔好叫呢味。覺得侍應的態度都幾好，完全無黑口黑面咁嚴重，可能係下晝同夜晚係兩班人卦；食物碟頭幾大，水煮魚同辣子雞都擺了半張檯，個人覺得是OK。當然如單看冷盤、麵等會覺得細細碟都唔定。如有機會找多幾個人會試試這裡的麻辣火鍋的。連埋三支啤酒，埋單四百幾，唔平，但想吃麻辣的可以一試.