日本野 (已結業)

旺角真係好多隱世樓上餐廳，今日老公生日緊係要揾間好既餐廳同佢慶祝，俾我上網揾到間係旺角銀城廣場9樓既日本餐廳，個名好特別，叫"日本野",老公問食咩，我米話食日本野，佢一頭霧水，咩呀！佢去到就知，真係日本野，原來係餐廳名。晚餐有井飯，有定食,加幾十蚊仲有個小食，送湯+飲品，價錢最平唔駛$100就食到。唔夠喉，仲可以再叫小食。我點左個佢最人氣"石燒吉列霜降牛小排",佢係個外皮炸左吉列先，內裡全生，再俾塊石板你自己燒熟。塊吉列牛小排，外脆內軟，入口即溶。和風柚子雞翼:炸到好香脆，完全唔油，加埋面頭既柚子，解晒炸出黎既熱氣感覺。鰻魚玉子:玉好滑，好濃蛋味，啖啖都係鰻魚。牛油果軟殼蟹卷:個份量好多，牛油果好香，配軟殼蟹卷食好清新。火炙燒三文魚壽司: 入口即溶，燒得剛剛好，一份2件 都只係$26榴槤炸彈:身為榴槤控既我，點可以唔用佢黎作終結，依度係即叫即炸，雖然出面都食到，但即叫即炸既係特別好食。