麵館皇

营业中

休息中

今日休假日！當然訓到日上三竿！出去銅鑼灣攪啲庶務！再食個早午餐！本來想食登龍街人氣拉麵，但都幾多人排隊，見呢間刀削麵未試過！自己好喜歡食麵！不同地方麵食我都有興趣！就入去試下！因為已經過了午市高峰期，場內只有八成滿！不過地方好細，枱櫈好迫，幸好都係光猛乾淨！我一個人食都要搭枱！我想試刀削麵同雲吞，但雲吞套餐又唔包麵！我問店員想食呢兩樣，佢又無話係邊個套餐！只係講：「你呢要雙拼，再加份麵，刀削麵要加$3，不過雲吞就會變成3粒咋，咁就$51！」最後我都唔知自己食邊個套餐再雙拼轉刀削麵，因為佢又無指住個餐牌解釋！而我之後自己睇都係搵唔到！總之佢夾到我兩樣食物啦！食物都要等一陣先到！酸辣湯雲吞刀削麵！好大一碗！個酸辣湯夠熱！一湯內有木耳絲、豆腐粗條、豬皮絲！酸酸辣辣，辣度剛剛會令我流鼻水！雲吞3大粒！皮唔薄但彈牙，餡料菜多肉少，但好多肉汁！肉質唔嚡！刀削麵闊身彈牙，有粗有薄，麵上面都有刀痕，口感都好特別！份量大，最後我都食唔晒！餐飲可以選凍豆漿或熱飲！我叫的熱檸茶正常！店員服務一般，除了幫我落單嘅阿姐對餐牌夠熟之外，其他店員都要問佢！我見好多附近做嘢嘅化妝小姐都來呢度食嘢！