平時都食開Set B ，好少食到有海鮮同和牛咁，所以今日就一於集中叫啲Set C先有嘅嘢。
首先係牛，有安格斯和牛、安格斯一口牛，同埋和牛赤身。啲牛的確比之前set B既好，唔會太韌，多啲脂肪，香口啲。三款嚟講一口牛比較難熟，亦都會有筋，但整體都真係好食過之前啲牛。
前菜試咗牛角明太子沙律，好好食，啲沙律加咗啲醋，再配埋明太子嗰種鹹鹹地，想食完又食，佢仲會有少少薯仔喺面，最後encore左一碗。
海鮮方面有蝦，廣島蠔，同埋帶子。啲蝦醃咗啲鹽，燒完之後，有啲鹹香，再加燶燶哋幾好食。
帶子加左牛油一齊燒，都唔錯，不過最後嗰啲唔知點解好鹹。
最正係廣島蠔，佢加左牛油連埋個錫紙一齊燒，啲壕都幾大隻，幾有鮮味又有汁，最後應該每人食咗八九隻。
最後食完仲會有一人一杯Movenpick 雪糕，不過可惜得雲呢拿同士多啤梨兩隻口味，冇得任食。
我哋有會員卡，埋單每人$448。
