喜點.鮮鍋粥底火鍋點心專門店 (已結業)

四個人打完牌，一家贏三家，實際上大家都無輸無贏，因為大贏家要出錢請三位輸家食晚飯，被屈去食打邊爐。這裡人氣旺盛，三五知已、一家大細都來食，全院滿座。要屈就要屈盡啲，食個貴啲$258 A餐。雪櫃的竹蔗汁、豆漿係任飲的。頭先打牌打到慶合合，飲番兩杯降降火，好過入啤酒汽水。火鍋係用米湯做湯底。4人份的A餐的海鮮拼盤超大盤，有7款海鮮，貴妃蚌、帶子都非常大隻。個餐仲包了一條多寶魚，是新鮮的，非急凍。所以，食落非常可口。黃金蜆有好多隻。雖然啲肉唔大，但就好鮮甜。龍蝦都好大隻，肉質結實爽口。新鮮海蝦食落香甜爽彈。超大的貴妃蚌肉多鮮甜美味。連鮑魚都有，這個海鮮拼盤果然豐富。手切安格斯肥牛是跟餐的，肉嫩油香。8款配料在五十多款配料之中自選的，點咗豬腩肉、肥牛、黑豚肉、鯇魚片、墨魚滑、菜餃等。用料都新鮮講究，所以每樣都好好食，我哋都非常滿意。兩個半小時之後，我哋就將所有食物吃進肚皮內。然後，就等店員幫手炮整和味海鮮粥，方法其實好簡單，只是將粥膽和一些芋頭和南瓜粒加進鍋內，滾一陣就食得。如果，再加些冬菜、菜脯、豬油渣來食，就更加出色。嗰種滋味法，真係一試難忘。