金池上海京川滬料理 (已結業)

一家三口在九龍城做完按摩後順便在附近食埋晚飯．老婆話想食上海菜，印象在金寶隔離有間咪行去睇睇．去到門口見晚飯高峰期裡面只得七成滿便心中一涼． 不過見裝修尚算企理就即管入去試試． 拿起菜牌一看已知並非正宗滬菜，問問女侍應有沒有開洋荵油拌麵，見佢一面迷茫就確實唔可以要求甚麼正宗上海菜． 立定心意只要唔太難食就算．只揀了一些最基本菜式希望食得落：麻辣拍黃瓜，回鍋肉加菜飯，嫩雞燴麵，上海粗炒，小籠包． 麻辣拍黃瓜好搞笑，根本冇拍過，只是用刀把黃瓜切成大大粒，拌ｄ豆瓣醬上碟．回鍋肉味道勉強合格，只是豬肉本身不是新鮮很重雪味．菜飯就非常油膩．嫩雞燴麵的湯好淡，同正宗的用濃湯差好遠．上海粗炒算ＯＫ，好食冇份不過唔太差．小籠包好明顯係雪藏貨，唔好食唔緊要，最衰係全部爛駛，甩皮甩骨，冇一隻可以完整地夾起食．食完只有一個疑問：咁o既廚藝都敢落九龍城開舖？？