西塘花記 (已結業)

聽聞灣仔呢邊開咗一間餃子店，上網睇過啲餃子都好靚同埋色彩繽紛，所以就吸引左我同朋友嚟呢度試下。鋪頭裝修嘅風格都好有特色，整體風格好舒服。我同朋友叫咗兩個小食，一個係鮮花拌木耳，另外一個係四喜烤麩。兩個小食都係凍嘅，木耳嘅醬汁係酸酸地十分之開胃，而四喜烤麩，就係甜甜嘅醬汁，加上烤麩就好似豆腐乾一樣。我哋兩個人叫咗一個招牌五福水餃同一個雨花石水餃。五福水餃有五種唔同色彩既水餃，其中最令我驚喜係白色嗰款水餃，食落辣辣地，睇返餐牌先知原來佢係剁椒魚水餃。另外雨花石水餃個皮就有三種顏色，雖然食落唔係好清楚係有咩分別，但係都食得出個皮係有少少酸酸甜甜，味道好特別。最後我哋仲叫咗一杯鮮榨淮山露同一杯紫薯露，我覺得兩款嘢飲都好特別，因為出邊好少會見到有淮山嘅飲品，亦都唔會太過甜，真係好值得推介。