今朝時間非常充裕，可以慢慢嘆個出前一丁早晨，路過見到名門難得有位唔洗等，即時衝入去坐低先。
menu 同以前唔同左喎，不過我記得名門既出前一丁唔好食，試試辛辣麵先。到底何時食湯麵用叉架呢？唔該比對筷子我！終於比我親眼見到師傅真係將丁麵沖過水，不出我所料，難怪出前一丁麵質不爽不滑又粉口啦，一食便知道。
自家叉燒出前一丁，湯底落埋生菜一齊煮，湯及麵都有充滿菜甜味，非常有阿媽既味道，兒時阿媽都係好喜歡如此煮理。生菜鮮嫩極爽甜，超讚！
自家叉燒醃味甜美，充滿肉香，炆得透徹軟腍，半肥瘦又不乾不硬，雖然完全無燒過，但好食喎。麵質粉而腍，不滑不彈，水平以下。
鮮牛肉出前一丁，可唔可以唔好一早煮定個麵底或者將出前一丁麵餅沖過水呢？依家又腍又粉口又無味，好難食呀！生菜超級鮮嫩爽甜，無得頂！
鮮牛好食，醃味甜美而散發著牛香，good！雖然略略乸過，好采不過份，味道質感蠻滿意。湯底瀰漫著香濃牛肉味，恰似牛肉濃湯，好好飲。辣椒油就麻麻地喇，不香不辣，咸咸地囉。
太陽蛋豬扒辛辣麵，居然可以煮辛辣麵煮得那麼好，高手游刃有餘，技術高超，可能比我還好！湯汁已滲入麵條之中染得淡紅，麵質嚥韌富彈性，味道質感均細緻，掛上特濃辛辣湯汁，滿分無得彈。
果然係香茅豬扒，預料之內，醃味甜美可口，不咸不濁，香茅味清香得宜又突出，肉質彈彈又水潤，優質！麵條捲實太陽蛋塞入口，甘甜蛋漿黏黏的跟香辣湯汁麵條融合，美味極致，滋味無窮！
雞扒榨菜辛辣麵，侍應肥姐話加腸仔 $10 有兩條，但我想食多士，兩條太多喇，雖然食到啫。諗住搏阿姐唔記得叫雞扒併腸仔，被發現左唔併得添，好記性果然專業，哈哈。
炸雞扒碎上略咸，辛好浸湯食還可以。外層乾硬，好采內裡既肉還嫩。榨菜連濃湯帶麵啜入口，滿足。
火腿蛋厚多？火腿厚蛋多？火腿蛋厚多？誤會晒呢，原來只係厚麵包，並不是厚炒蛋，失望啊。
火腿蛋厚多，意料之外好食喎，係好好食！拿起成手都係牛油既？點解牛油搽兩面咁搞笑，最初以為底面倒轉左夾添，水吧阿姐真風趣，咁好客益我，勁多牛油，正呀！
好耐無食過有質數既三文字炒蛋，蛋味濃郁又香口，調左味有咸香，混上火腿肉汁更好味。厚多士居然外層脆脆而裡面好軟塾，加上大量半溶牛油非常滋味。
