泰記 (已結業)

小弟今日有空經過跑馬地，打開open rice，見到各弟兄姊妹去勁贊昌記既碎牛蛋公仔面同油砂多有幾好食，所以專登走上去黃泥涌市政大廈，想去一見佢真身。當我見到昌記個牌走去準備坐低嘅時候，有個好熱心嘅待應過嚟話我唔可以坐個度，要去隔離張枱坐，我就懵盛盛咁聽佢講坐低左響隔離張枱度。我老婆坐低先，個侍應已經好快同佢落單，我老婆落完單之後，我開始睇下個餐牌有咩好食，發覺餐牌上面個名唔係昌記而係泰記已經心知不妙吖，再睇睇隔離張枱，點解個餐係唔同嘅？今次出事啦！咁好啦，既然老婆坐低咗單都落埋，我就硬着頭皮都睇下有咩食啦。唔睇由自可，睇完把幾火，一望已經知道係垃圾茶餐廳級數。我哋兩個人叫左個三絲炒烏冬同黑椒汁頹飯，個三絲炒烏冬難食到嘔茄，烏冬不單止無味，啲香腸仲要臭既！嗰碟頹飯，好彩午餐肉香腸冇乜特別，不過啲飯同果汁係唔熱嘅。我本來懷著非常之期待嘅心情去黃泥涌市政大廈想食下好嘢，最後我懷着非常之憤怒嘅心情離開。琴晚先睇完無線洪永成講三八線點樣分開咗南北韓，我今日完全感受到呢條三八線點樣分開咗天堂與地獄，亦都激發左我今次第一次響open rice留言。最後奉勸大家一句，坐低之前睇下個餐牌係邊間餐廳先好