番本日式放題 (已結業) 查看

今日无所事事，谂著同朋友揾个地方食吓个放题吹吓水，上openrice睇吓旺角有边间好。咁啱就睇到呢间番本，见个名几特别，地方几就脚，网上评价又唔错，于是就胆粗粗上去试吓。去到见到地方几阔落，座位几多，去到即有位入闸唔使等。要试就梗系要试真啲，二话不说加钱试埋个「升级之体验」，我哋第一轮就点咗个赤虾、带子、油廿鱼、烧羊架同埋个忌廉煮青口。刺身固然系厚切加鲜味，卖相砌得靓靓仔仔。但最意外系个羊架同青口，系意外咁好食，真系忍唔住想点多几转，奈何要留肚试其他嘢，唯有下次嚟再食过。生嘢食唔到太多，食完一转后我哋转攻熟食。值得一赞嘅系呢间嘢熟食嘅选择真系几多。先嚟一碟炸物，炸得啱啱好，至少卖相系金黄色嘅，而唔系黑炭头。我朋友食个芝士年糕食得津津有味，我就几欣赏个炸鸡软骨，炸得恰到好处。寿司料多饭少嘅配搭，一口一件，啱哂我哋想试多啲唔同嘅嘢。饮品选择都真系算丰富，除了汽水、杨协成，仲有日本啤酒、梅酒、清酒。我哋就拣咗梅酒。呢间嘢食选择真系几多，作为食客真系名副其实嘅「番本」。