名門私房菜

营业中

休息中

今日心情好，同個朋友仔食好啲，係灣仔搵左呢間順德私房菜，順德菜製作認真，味道都一流。杏汁豬肺湯，洗豬肺好花工夫，而且唔係個個識洗，係呢度就有得飲，仲有新鮮靚豬肺。個杏汁係用南北杏去磨，好香好滑，冇平時食開好似杏霜果種又甜又搶喉嘅味。原來仲有花膠，飲完仙氣滿滿。冰鎮鮑魚，好爽好彈，一咬就開，加埋個醬汁提升鮮味，好食！醬爆黃金蝦多士，一嚟到個鹹蛋黃超香，裏面全部都係蝦，邪惡程度係十級，朋友仲話我食晒啲咸蛋黃，哈！麵豉醬西生菜，有肉又有菜，雖然只係生菜，但師父都好用心去烹調，麵豉醬個味恰到好處，生菜係瓦罉入面都好爽脆，冇overcook豉油雞，個甜豉油超正，雞入晒味，又肥美又啖啖肉。蒸魚腸，又係一個手工菜，魚腸冇腥味，配埋蒸蛋，口感實淨，上面仲有芫荽提升香味。蛋白杏仁茶，有少少似燉蛋白，用南北杏磨汁，食到杏仁甘味。