「The Platter」係以火車做主題，感覺幾有趣，有啲似喺火車車廂入面食飯，有現代感同時又有趣味，小朋友都好鐘意呢個小企鵝同火車卡嘅主題裝飾，話好得意。
至於食物，真係無得輸，海鮮夠新鮮，又多種類！有冰鎮海鮮區，包括鱈場蟹腳、麵包蟹、白蝦、藍青口、翡翠螺等。刺身拼盤亦有唔少款式，包括三文魚、鯛魚、阿根廷赤蝦、魷魚、北寄貝、赤貝、吞拿魚，質素高，口感好滑嫩同鮮味，好符合海鮮主題。
主菜方面推介有幾款必食嘅招牌菜，例如蒜蓉陳皮蒸龍躉頭腩，龍躉魚肉鮮甜而且韌度適中；仲有避風塘炒蜆，花酒煮螺，香辣惹味；蝦肉肥美嘅黃金大蝦，黑胡椒肉蟹味道濃郁兼帶少少辛香，非常開胃。仲有即煮忌廉牛油白酒煮波士頓龍蝦，味道超級香滑。
另外，爐端燒區亦非常吸引，有鮑魚、扇貝、蝦、七味雞翼等多款燒物，即叫即燒，熱騰騰上枱，味道一流。熱食區有燒原條穀飼肉眼扒、燒羊鞍，肉質嫩滑，火候掌握得好好。
又有天婦羅炸物，炸蝦，炸番薯等等，邪惡又滋味。
甜品方面亦唔馬虎，有朱古力噴泉、多款西餅蛋糕、新鮮生果，仲有知名品牌雪糕如Häagen Dazs同Mövenpick，啱晒甜品胃。天婦羅炸得脆卜卜，鬆化唔油膩，窩夫配料豐富，令整餐飯完美。
服務方面態度友善，員工隨時留意客人需要，即使自助餐咁多款菜式，補貨速度都算快，保持食物新鮮同充足。
食完仲可以比小朋友同屋企人去戶外位置影相同上去室內遊樂室玩，真係大人小朋友都好岩嘅地方！
