生記飯店 (已搬遷) 新店位置

今日同成班同事一行八人在此午膳,去之前先看網上評價,水準大致上中規中矩,不過不失.今次來差唔多試哂佢哋嘅招牌菜.詳細介紹如下:鹽焗雞味道鹹鹹香香好入味,雞肉雖然整得嫩滑,可惜冇鮮雞味,莫非係冰鮮雞??????若果係的話,食水都好深啫,成二佰八十蚊一隻.西洋菜湯雖然跟餐送嘅,但味道ok,我諗應該冇乜味精,起碼飲完唔會勁口渴.枸杞浸豬膶湯底清清哋,味道唔鹹,豬膶煮得軟滑又有口感,不過枸杞菜有少少老身咗.煎藕餅做得幾好,事關蓮藕粒同肉嘅比例啱啱好,食時有口感得來又唔會太油膩.川椒雞又鹹又辣唔好味.生炒骨味道甜酸適中,炸得香脆,可惜排骨太瘦,我只係食(倒)骨同粉漿,有啲失望.梅菜扣肉味道嘛嘛,扣肉整得唔夠淋滑鬆軟,梅菜調味過甜.梅菜蒸菜心啲梅菜估唔(倒)咁好食,鹹甜適中,味道啱啱好,送飯一流.至於菜心比較老,唔夠嫩口,有渣.梅菜蒸肉餅質感軟滑得來有咬口,不過味道鹹咗啲.想話比大家知,午市係冇白糖糕送的,承惠四十大元正.我哋叫咗一碟,味道清甜甜冇酸味,可以一試.總括嚟講,整體成績不過不失,未試過可以試吓,試過嘅冇必要重回舊地.