GF Bistro (已搬遷) 新店位置

朋友介紹下知道荃灣有間餐廳食生蠔好出名，而且選擇又多，就專登嚟試啦！ 喺門口見到一個外國人彈結他真係樂韻猶存， 氣氛即刻唔同曬。前菜點咗羽衣甘藍芝麻醬沙律、四隻法國La Deesse女神生蠔、湯就揀咗黑松露忌廉湯、小食揀咗燭法式田螺、主菜揀咗鵝肝拼牛柳、甜品就要咗火焰雪山。羽衣甘藍沙律加埋芝麻醬原來可以味道好夾，但最重要係羽衣甘藍同埋d蕃茄仔都好新鮮，做前菜一流。生蠔就超大隻而且La Deesse女神生蠔比較重海水味，加埋檸檬汁食好fresh，好似置身海洋中間咁樣。黑松露忌廉湯就有好重黑松露味，而且每一啖湯都好滑，個忌廉湯加埋佢哋提供嘅三文魚他他醬及鵝肝醬多士，一啖湯一啖多士絕對係絕配。法式田螺好入味，雖然細細隻但好有螺味，底部嘅薯蓉亦都好香口。主菜鹅肝拼牛柳嘅鵝肝煎得好香口，鵝肝亦都口感一流，牛柳七成熟，外面深啡色內裏粉紅色， 廚師煎得好有技巧，超厚身嘅牛柳可以煮到好冧，而且切落去絕對發現入面嘅肉汁被鎖住。 火焰雪山上台前部長點火嗰刻，火焰雪山個賣相好靚，絕對係打卡之選，而內裏包含咗各種嘅味道，絕對係小朋友至愛。