六両三 (已結業)

年尾會去一轉台灣，諗住去之前都未必會再試台灣菜，不過就係因為有人介紹所以今晚決定一試。來到嘅時候可能尚算早，不用等位，鋪入面嘅裝修一開始以為來到日本餐廳。餐廳不算太，而且有bar枱，正因為咁，有更重嘅家庭人情味。餐牌設計簡約，選擇都算多。我就揀左川味紅燒三寶牛肉配粗麵。湯底相當濃郁，估計廚師係湯嘅烹調方面落左功夫。三寶之一嘅牛筋柔韌可以算係兼備，膠質好豐富。牛腱食落好有嚼頭，好爽。而牛肋條非常軟腍，相信已經吸收湯底嘅精華。三寶表現令人滿意！而麵質咬落好有嚼頭，彈牙，已入晒味。而另外還叫左每日限量嘅蕃茄牛肉麵，湯底冇咁濃郁，加左蕃茄之後好似將個湯昇華到另一種特別嘅味道。配上已經讚賞左嘅牛肉，呢碗麵自然都係推薦之一。最後仲叫左皮蛋豆腐，加上木魚作為配料，似乎將呢碟小食畫龍點精，提升左豆腐本身嘅鮮甜！两個字形容: 滿意！