四季良晨 (新都城中心) (已結業)

今日突然間又想食台灣嘢，行過見到呢間餐廳啲嘢食好似幾精緻，咁就一於試下啦。好耐冇食飯嘅我，見到有滷肉飯都想食下，所以就嗌咗個晚餐，晚餐包咗個燉湯同埋上湯時蔬，而我就揀咗炸排骨。佢啲豬扒幾好食，炸粉唔會太厚，啲豬扒都幾腍。而佢個滷肉飯都幾好食，啲汁夠晒香。而男朋友就嗌左個雞翼雞肉飯，個雞肉飯相比起滷肉飯會清少少，但係感覺好似健康啲。佢啲滷水雞翼幾入味，最重要係啲雞翼大大隻，好抵食。而佢個燉湯都幾好飲，係冬瓜薏米煲豬骨，佢啲冬瓜真係好好食，又甜又冇渣，呢個燉湯都真係冇味精㗎。另外我哋仲嗌咗兩個小食，其中一個係麻辣貓耳朵，佢啲木耳仔都幾爽口，而個汁都啱啱好，唔會太辣。另外仲有一個麻辣牛肚，不過呢個麻辣牛肚感覺就辣咗少少，淨係食到辣味。而飲品我哋就試咗蜂蜜檸檬蘆薈同埋蜜桃烏龍蘆薈，呢兩杯入邊都有粒粒蘆薈食，飲落又唔會太甜，個茶底都幾香㗎。