梅之味 (麗都大廈) (已結業)

由灣仔過去太古廣場睇戲，先去蘭杜街搵嘢食，本來想去食雞扒，點知發現開咗間清新小店，全店以白色為主調同蘭杜街其他店感覺唔同，睇餐牌發現佢係食台式食品嘅，見價錢唔貴就決定下次先去榮式。入到去有位台灣太太向我哋介紹，佢話佢哋嘅「三杯雞」好出名，叫我地要試吓，佢建議我哋要點多個白飯因為三杯雞嘅味道比較濃，醬汁好送飯。好耐冇食過咁滑咁嫩嘅雞件，但佢係全熟嘅，唔似白切雞嗰啲骨種係生生地。個醬汁濃香杰身，每一件雞件同埋啲菇菌類都掛滿左醬汁。一煲嘅份量其實幾多足夠兩三個人分享。「擔擔麵配豬扒」原本想叫擔擔面配雞扒，台灣太太提我地已經點左個三杯雞，所以我哋轉左豬扒，佢一上枱我發現塊豬扒比手掌更大，炸得好酥脆，個擔擔麵芝麻味幾重，冇乜辣度，湯汁都係非常濃郁。點咗兩樣重口味嘅食物，要選擇返一個清淡啲嘅平衡下，好耐冇食過「香茜魚羹」佢一大碗可以分到四五個飯碗，除咗魚肉仲有芫荽豆腐，魚肉唔係鯪魚球而係新鮮嘅魚肉，因為係羹湯，好濃好飽肚，佢個鮮味亦都好足夠，起我哋食完咁濃味嘅食物都仍然覺得佢好鮮。始終台灣菜都係台灣人主理比較好，佢哋嘅細心同埋真材實料真係無得輸。