黑丸嫩仙草 (已結業)

香港华洋杂处，各处乡村各处例。对美食嘅追求无分国界，所以香港地充满各式各样有地道特式嘅食肆。呢间新开小店专门卖台式地道甜品，店小坐位更少，只有三个坐位同一张立食枱！！装修简单干净，类似香港八十年代嘅快餐店。听住国语同闽南话歌曲嚟叫嘢食，真系好有台湾FEEL😁舖头面临大马路，所以老细用胶做屏风，既阻风隔音，又可以望住街景食嘢。黑丸嫩仙草$30既然以此命名，梗系要试吓呢个招牌菜。呢个名对于香港人可能比较陌生，其实黑丸即系台式珍珠奶茶嘅珍珠，嫩仙草就系凉粉。同间舖嘅装修一样，呢个甜品以传统做法，以牛奶绿头仙草做底，之后加金瓜圆芋圆同黑丸。其实我最想试嘅系芋圆同金瓜圆，因为从来未试过喺香港食过有台湾味道嘅芋圆，一系太腍，一系太散。呢次食嘅芋圆、金瓜圆，四方圆角似枕头，天然芋头、蕃薯甜味加Q弹口感，越食越想食，而且唔会一咬就散，有少少似韩国年糕嘅口感。牛奶捞埋仙草同绿豆，食落充实饱肚，珍珠非常弹牙，比其他珍珠奶茶店提供嘅更出色。店虽简陋但风味搭够，老板ONE MAN TEAM一脚踢，态度殷勤亲切，可惜眼阔肚窄，唯有下次留肚试吓其他款式。