士林·便丼達人 (帝城大廈) (已結業)

公司附近開咗間台灣小店，鋪面唔大只有兩張枱，不過食物選擇就有好多款，我諗佢主力做外賣。今日第一次幫襯，叫咗個二人台客荔芋炆燒雞煲（ $120 ），估唔到外賣仲送埋原套煲具，有三腳架和火油液，可以輕鬆返屋企加熱煲煮食，超正呀！呢個荔芋炆雞幾好食，芋頭好多，切粒，越煲越林，要來撈飯就真係一流，另外加埋啲薑蔥一齊煮，啲雞好入味，多肉少骨，好味呀！套餐本身送兩碗白飯同埋兩罐汽水，我哋加錢轉左要佢嘅士林樽仔鴛鴦和樽仔奶茶，茶底好似係舖頭自己煲嘅，茶味香濃，唔錯唔錯。我哋仲叫咗招牌士林鹽酥雞（輕量版$28 ），都有五至六件，唔算太少，炸得香脆又夠入味，相當唔錯。還叫了我最愛的香蒜台灣香腸（$14 ），切片上，好味呀！另外佢有13種味道嘅shake shake薯條，我哋試咗派對芝士唔重粉，芝士味濃，如果有兩包粉就更加好啦！哈哈，薯條粗身，炸得乾脆！