兆鳥 (已結業)

可能係尖沙咀最高質嘅燒鳥居酒屋✨ 餐廳主打日式串燒同各種稀有部位嘅燒鳥，提燈、雞掌肉、雞冠、雞蠔肉等等呢度都搵到！串燒調味簡單更食到食材本身味道，不得不讚師傅手勢超好燒得剛剛好，外層有炭火香味內裡仲保留到肉汁超正🤤 除咗燒鳥外仲試咗佢哋前菜同熟食，最驚豔嘅係鹿兒島薩摩赤雞刺身，有充滿雞油香嘅雞髀肉同瘦啲嘅雞胸肉，雞皮略為火炙過食落油香十足，口感其實同魚生差唔多，隨個人喜好加上薑末、蔥粒、芥末等別有一番風味✨ 另外雞肝芝士伴醬、麻辣煮手羽同吉列豚肉紫蘇梅燒都推介，最尾整返碗暖粒粒嘅雞湯素麵真係捧住個肚走🤰🏽