S2 Kitchen (已搬遷) 新店位置

記得上年嚟過呢度同朋友食生日飯，印象中呢間餐廳無論服務定食物都好有質素，所以今日收工都捉埋男朋友過嚟試吓。前菜就叫咗個沙律，佢上面有啲黑松露同埋蟹子，而佢個蕃茄係去咗皮浸過糖水，啲菜都好新鮮，加埋啲沙律醋，都好開胃。小食就叫咗個芝士魚餅，中間有滿到漏嘅芝士，不過就冇乜芝士味，最主要都係食到面頭嘅沙律醬，但係魚餅加沙律醬，味道又幾夾。最保持水準嘅都係呢個芝麻雞翼，同我上年食到嘅味道一樣。都係外皮揸到脆卜卜，入邊好嫩滑嘅雞肉仲有好多汁。最後就揀咗呢個蘆筍炒飯，今次個炒飯唔似上年咁樣吵到粒粒分明，味道亦都比較淡，但係整體來講都唔差。可能因為時勢同市道嘅問題，令到餐廳嘅服務同質素都唔似上年咁出色，但係好嘅嘢其實值得支持，希望下一次再去嘅時候可以見到佢變返之前咁出色。