星聚軒

营业中

休息中

今日假期上晝打完波，心思思睇吓想食乜嘢，記得之前有一個短片介紹呢一間中菜餐廳嘅下午茶有燒鵝髀瀨粉，價錢係$49好似好抵食，所以嚟試吓。燒鵝髀好香肉質還算鮮嫩，但係冇脆皮，瀨粉值得讚，非常之軟熟同香，雖然個賣相同幅相都仲有啲距離，不過以$49 可以食到燒鵝髀瀨粉算係唔錯。（不過呢個有少少情況出現，就係上嚟之前我係先打電話上嚟問，有冇廣告講嘅下午茶雞髀燒鵝瀨，喺電話裡面嗰位職員話有叫我上嚟，上咗嚟之後同佢哋落order跟住佢哋話今日係假期係冇嘅，我就話因為打電話上嚟話有我先上嚟，個職員都好快幫我處理話特別幫我落order，值得一讚）另外叫了個下午茶點心孖寶：個叉燒腸質素一般，唔算差亦都唔特別好，叉燒唔多，亦唔係特別香口，反而個菜乾豬骨粥水準之上很綿，可惜豬骨味道仲未煮到入粥裏面，整體個人確得可以（假日$49.8，平日$39.8）兩樣點心算係有性價比。特別一提係名茶佢本身有火爐去保住溫度，只係收$10茶錢我得呢個值得一讚，因為我本身鍾意飲茶，而且鍾意飲水滾茶靚嘅熱茶，呢度有加分。不過下午茶3:30鐘就截單，所以要早少少上嚟。