火鍋撚 (染布房街) (已結業)

第一次寫食評就比咗呢間火煱撚，冇改錯名，食完我都想講粗口。首先，公度啲講句，佢嘅蚌、帶子同牛我都覺得唔錯，但價錢偏貴，份量又唔多，每人四百幾落樓但個肚都好似乜都冇咁。同埋佢啲冷氣唔係好夠，不過呢個都小問題。我最嬲嘅係佢漏單，其實漏單真係間間舖都有嘅，補返咪ok囉，但係當我地第一round叫嘅墨魚滑同另外兩樣嘢，到第二round叫嘅嘢黎齊都未黎，又見到隔離遲過我地黎嘅人都已經上左墨魚滑，追問個阿姐，阿姐話人多，啲嘢出緊架啦（隔離枱都有啦喎），咁我地再等，點知第三round叫嘅嘢都黎曬都未見到佢，再追問同一個阿姐，佢話佢新黎唔知咁多（個刻真心著左，新黎唔係藉口，同埋咁你之前唔好同我講出緊呀！）一嬲之下回左佢句「咁不如你叫做得耐啲嘅同事黎」，個同事黎到幫我地check完發現漏單，咁點解第一位阿姐睇都唔睇就話黎緊？即係我地一直等緊啲唔會出現嘅嘢？我明白有時人多忙係會漏單，但如果你都唔知自己漏單，我又可以點幫你？其實四百幾蚊真係有更多更好嘅選擇，但呢一間真係食到成肚火，冇下次！