知魚知樂 (已結業)

星期六和男朋友一齊去黃埔食餐飯，咁啱經過知魚知樂有位待應同我地講當日有個優惠就係叫任何一客烤魚，都會送價值$169蚊嘅四川烤串，一共有48串，見新開張有嘅樣嘅招徠，就入去試下。我地叫咗佢一客酸菜魚兩個人食，的而且確，佢嘅魚整得唔錯，連平時唔食酸菜魚嘅我都覺得幾好食，雖然我唔食辣，但因為佢地無得走辣，所以只可以㨂程度最輕嘅小辣，坦白講佢魚嘅份量唔少，每一片仲𠝹埋花，整得好靚又無骨，但最大嘅問題就係佢嘅招徠方式...明明白紙黑字寫明重慶串燒有48串，但我地食完就發覺只得36串，差成一打。同待應講話數量唔啱，佢就只係話每枱都送咗4串大嘅雞軟骨，但就無就烤川嘅數量做任何解釋，只係叫廚房補返四串所謂大嘅雞軟骨比我地...計埋嗰4串應有嘅雞軟骨，我地枱一共只有40串，差成8串。其實，我地並唔介意你用送“一客小食”作為一個招徠吸引食客，但問題餐廳白紙黑字寫到明送成48串串燒，比就只係比咗36串，仲要唔問都唔比嗰四串所謂送嘅雞軟骨，咁樣嘅體驗，雖然你啲待應勤力，服務態度都唔錯，但係感覺上，似係呃人嚟食嘢咁...新餐廳，啱啱開業，贏咗人流，輸咗聲譽，係香港人真係咁好呃，定係生意其實就係要咁做？