四季良晨 (新都城中心) (已結業)

近排真心好耐冇食過台灣菜，所以特登搵左一間出名嘅台灣菜餐廳食飯。依間係將軍澳區好出名，野食又平又好味，好值得一食。滷水豬手飯定食點左個套餐，配埋上湯浸時菜同原盅燉湯。滷水豬手真心幾好味，滷水味非常濃，而豬手食落肥肉唔多，肥瘦比例啱啱好，成隻豬手嘅骨膠原非常多，可以美下容。今次加左$6，轉左滷肉飯，滷肉用嘅係肥瘦肉，肉粒大小適中，仲有冬菇，整體黎講幾好味。原盅燉湯係海底椰湯，飲落好清甜，非常滋潤。紅燒三寶牛肉定食都係套餐，又有菜又有湯。紅燒三寶係牛筋、牛腩同牛肚，牛肉係用滷水燉煮，滷水味濃郁，牛腩肉質食落柔軟，牛筋食落有韌勁，而牛肚爽脆可口。鐵觀音珍珠鮮奶茶係一個幾有趣嘅配搭，飲落茶味非常濃，有兩種茶味，入口係淡淡嘅奶茶甜香，尾韻係濃厚嘅鐵觀音茶香，珍珠食落幾煙韌同有咬口。都點左日式紅豆抹茶，紅豆同抹茶係絕配，飲落有抹茶嘅茶香，但飲落有少少抹茶粉，未溶得曬，紅豆食落甜度適中。