新利記 (已結業)

今時今日經濟唔好，自然想搵又平又抵的晚餐，可惜西灣河好多食肆食個晚餐郁D都最少要$25。適逢家人北上，而我又懶唔想煮，於是就去新利記食。新利記係西灣河入面算係抵食，炒一丁連茶啡或例湯只係$22，雙拚麵都只係大約$17，就算要出前一丁都唔駛加錢。我7點前就去到叫外賣，食肆入面差唔多坐滿。環境就幾擠迫，外面環境就幾邋遢，我見到整腸粉的職員刮走腸粉鐵盤上的垃圾，之後求其將垃圾掉在地下，周圍有蒼蠅飛過都無理，附近又無蒼蠅貼。以前叫午餐就算叫個雙拼麵都要等約15分鐘，今次叫海鮮炒烏冬5分鐘就炒完。海鮮炒烏冬入面有蔥、蟹柳、獅子狗卷粒、小量香腸粒及芽菜。師傅炒得唔算「濃」，海鮮料算幾多，而且又幾大盒，$20有咁既質素都算唔錯。海鮮炒烏冬送埋例湯或茶或咖啡。例湯係霸王花湯，但只係得幾啖湯有小小味，整體係淡而無味。