福岡漢堡扒 (厚福街) (已結業)

尖沙咀厚福街真係一個揾食好地方 。今日嘅晚餐就同朋友去咗“福岡漢堡扒“， 化身半個廚師半個食客。我哋點咗一個二人餐 $338，有兩份芝士蛋蒜漢堡 中size，加一個月見牛味噌丼飯 ，加15蚊仲有大大杯梳打。食物份量十足 ，就算係好大食嘅都相信會食得飽 。 漢堡下大概有一個女仔嘅拳頭咁大， 旁邊有一塊熱石， 而且店員會好細心咁耐不耐就會主動更換。 用個剷剷起自己啱心水嘅大細，然之後放落熱石到，每邊煎三四秒到就食得 ，再用芝士蛋包裹住漢堡，口感會更加豐富。 而個牛丼飯亦都好似圖片一樣，充滿曬牛肉 。牛肉味幾出， 有牛味，唔似某啲大集團一樣得個樣。 個人覺得15蚊加一杯梳打係幾抵嘅，因為杯梳打真係好大杯。 枱面嘅設計已經有一個煙通對住塊熱石 ，大部分嘅油煙都已經畀佢吸走，所以唔怕會食到成身味，樣嘢係一個加分位。