泰皇閣泰國菜館 (已搬遷) 新店位置

九龍城嘅泰菜餐廳一向競爭激烈，今次又俾我發掘到一間正野，好值得推介，有特色之餘仲水準十足。 鰂魚沙律喱個可以話係喱度嘅特色同招牌菜，因為見到好多人食。上到枱，淨係講賣相已經拎滿分。鰂魚起哂肉，然後魚肉連同魚骨一齊炸到金黃香脆，底下再伴埋青木瓜沙律。下面嘅沙律非常重料，調味到位，辣得黎又夠好清爽，再配埋炸左既魚肉一齊食，又係另一番風味！ 燒牛肉食落淋滑彈牙有咬口，牛味十足，仲帶點酸甜味。配埋旁邊嘅秘製泰式醬汁，酸酸辣辣嘅味道感覺好刺激，當前菜食黎開胃一流。 咖哩炒蟹選用嘅係上等膏蟹，多膏之餘蟹腳亦非常實肉，食落好鮮甜。咖哩唔算辣，勝在咖哩味好香，濃厚嘅質地最適合用黎點麵包食啦。