王家沙 (已結業)

果日我地3大1小去又一城行街，買完野之後就決定去王家沙食個下午茶。去到見到個環境唔係太好，始於係喺個電梯底下面，仲要係商場死角位，而唔係完整嘅店舖格面，所以唔係太舒服有少少壓迫感。但由於友人鐘情於上海菜，所以最後都入去食。入到去個侍應俾咗張好入嘅枱我地，但真係太焗所以我地要求坐出面啲枱。一坐底見到張餐牌選擇算多，我地叫咗五道菜同兩杯豆漿。依個正宗酸辣湯的確唔錯，酸辣分明，唔會淨係食到一種味 食完仲有莫名其妙既感覺，好精神好爽！家鄉炒年糕算係幾樣之中最好食！成道菜好入味、濃郁，年糕夠哂彈牙，配菜亦好夠完全冇慳料啊 我地大家都食唔停，未食過既真係值得一試依道菜！好多地方既生煎包都試過，又一城依間既生煎包唔錯，包底好脆金黃色，入面嘅肉汁好juicy，唔會有種乾巴巴嘅感覺！我地都覺得依個咸薄餅嘅葱明顯過少，冇咗佢嘅特色，味道亦偏淡。我地好期待依個以王家沙為名既擔擔麵，仲選擇咗唔辣。點知俾咗失望我地，賣相唔錯但係唔夠熱，麵太軟，冇咗爽嘅口感，真係好可惜！豆漿亦夠濃，唔會似溝咗水咁。最後我地食咗$28x，總體算唔錯但環境真係唔係太好，想舒服放鬆既話都唔會再選擇又一城嘅王家沙！