金公館 (康怡廣場北座)

营业中

休息中

今日帶媽子嘆下午茶，位於康怡廣場，地下搭lift 上三樓勁方便。野食選擇幾多，價錢都ok, 坐得舒服。✨涼拌雨花海蜇：餐前先黎個涼拌小食～海蜇頭厚身，食落爽口滑嘟嘟。麻油味幾香，仲有少少蒜粒同芫茜碎，令到佢更加香口同惹味。✨蘿蔔絲酥餅： 媽子最愛，新鮮熱辣超鬆化，蘿蔔饀幾多，甜甜的勁juicy.✨香煎墨魚餅：墨魚味幾濃，而且食落啖啖肉非常彈口。如果可以加d 蔥，芫茜又或者粟米煎就更加正。✨杏汁白肺湯：以前真係勁驚d 杏汁味，覺得好似藥水，但最近居然轉左口味接受左。其實個杏汁都令到個湯幾清香，而且湯料都幾足，有雞腳，芥菜同豬肺～～飲完個人暖晒。✨五代同堂炒飯：呢個飯好香，飯上面沾滿左蝦籽，入面仲有彈牙既蝦肉，脆脆地既蝦乾，爆香左既櫻花蝦同蛋碎。雖然用料簡單，但真係幾好食，份量唔細，兩個人食超飽肚。✨楊枝甘露：汁底好香花奶味，雖然芒果酸酸地，但令到個甜品又唔會太甜，唔錯嘅飯後甜品，好滿足好飽。