螢壽司 (已結業)

黎到螢壽司，格局似係日本小店風格。呢間日本餐廳有好多平時連鎖壽司店食唔到的魚種，仲好多日本直送的新鮮刺身。我地點左個螢極上壽司拼盤，因為個套餐有大拖羅壽司，單點個大拖羅壽司要$100，但個拼盤只要$398，仲有11款貴價壽司，CP值超高！個拼盤仲有原隻牡丹蝦壽司連埋蝦頭，食完壽司個蝦頭仲可以加$10炸埋黎食！個蝦頭勁脆勁好味！脆到成個食晒！我見佢有日本直送的秋刀魚刺身（$228）仲可以+$20 壽司兩食，所以叫左黎試下。黎左刺身，擺盤都幾靚！秋刀魚燒就試得多，無調味就咁生食，都係第一次。入口第一啖，嘩！好鮮甜呀！完全無諗過秋刀魚刺身係咁正，一點魚腥味都無！一食就欲罷不能！食完刺身就到壽司，一樣極度鮮甜，而且同醋飯都好夾～但刺身同壽司，我會選擇刺身，那份單純口感同鮮甜味！侍應一樣問我地加唔加$10炸埋條秋刀魚魚骨食，梗係要啦！呢間日本料理炸功真係好得，條魚骨又炸到脆卜卜，成條吞都無問題！正！最黎仲叫多個雜錦天婦羅（$78），有兩隻大蝦，仲有好多蔬菜，份量都算幾多，但相對頭先炸蝦頭同炸魚骨，反而失色左不少。整體來說，水準相當不錯，壽司及刺身簡直一絕！