omakase嘅第一個前菜就係蟹膏豆腐，一見到已經覺得超靚，完全攻破咗外貌協會嘅心，打響頭陣！
sashimi全部都好新鮮，我最鍾意嘅包括深海池魚，好啱呢個季節食嘅薑蓉秋刀魚，同埋用咗自家製嘅柚子汁整嘅鱈魚白子，超級Creamy!
至於呢度嘅特色就係佢哋嘅炸串，呢度嘅串揚真係超級出色，可以話我喺香港食過最好食嘅，真係有日本食到嘅質素，每一份都係師傅喺你面前新鮮即整，絕對係Omakase嘅神！茄子、沙椎魚、紫蘇雞胸肉同葡萄豬肉每一樣都好出色，外脆內Juicy，最特別就係葡萄豬肉，真係冇臊味，口感亦都相對脆口，好特別！
磯煮鮑魚真係一流，口感有嚼口，但係絕對唔會韌，加埋醬汁調配得剛剛好，甜甜地，脆脆哋，用嚟配酒真係超正！
明太子半熟龍蝦都好出色，龍蝦鮮甜之餘，半熟程度令到口感同甜度都有提升，配埋明太子就有一種umami嘅味道。
明太子茶漬飯絕對唔可以睇小佢，食到最後真心覺得好飽，但係成碗都比唔係太鍾意澱粉質嘅我清晒，可想而知幾好味！除咗係用鮮魚湯整，加入咗玄米、海苔同埋芝麻混合嚟食，不論口感或者味道都調配得剛剛好！
食到最後就要咗個豆腐雪糕，完美嘅一餐就係咁樣，多謝師傅用咗咁多心機準備呢餐晚餐俾我哋！
